اسلام آباد : وزیراعظم شہباز شریف نے کہا ہے کہ پوری قوم مل کر دہشت گردی کے خاتمے تک جنگ جاری رکھے گی ،دہشت گرد پاکستان کے دشمن اور عوام کے قاتل ہیں، ارض پاک کو اس فتنے سے پاک کرکے رہیں گے۔ وزیر اعظم نے اسلام آباد کے سیکٹر آئی 10 فور میں خود کش دھماکے کی شدید مذمت کرتے ہوئے واقعہ کی رپورٹ طلب کر لی۔
جاری بیان میں وزیراعظم نے اسلام آباد پولیس کے شہید ہیڈ کانسٹیبل عدیل حسین کو خراج عقیدت پیش کیا اور شہید کے درجات کی بلندی اور زخمیوں کی جلد صحت یابی کی دعا کی ۔ وزیر اعظم نے زخمیوں سے ہمدردی کا اظہار اور انہیں بہترین طبی سہولیات فراہم کرنے کی ہدایت کی ہے۔وزیر اعظم کا کہناتھا پولیس اہلکاروں نے اپنے لہو کا نذرانہ دے کر دہشت گردوں کو روکا، قوم اپنے بہادروں کو سلام پیش کرتی ہے ۔
وزیر اعظم نے کہا الحمدللہ! قانون نافذ کرنے والے اداروں کی بروقت کارروائی سے بے گناہوں کا خون بہانے کا بڑا اور مذموم منصوبہ ناکام ہوگیا۔ عوام دہشت گردی کے خاتمے کے لئے اپنی فورسز کے ساتھ بھرپور تعاون کریں۔وزیراعظم نے شہید پولیس اہلکار کو شہدا پیکج دینے کے ساتھ ساتھ آئی جی اسلام آباد ڈاکٹر اکبر ناصر خان کو غیرمعمولی بہادری کا مظاہرہ کرنے والے اہلکاروں کو انعام اور تعریفی اسناد دینے کی ہدایت بھی کی ہے ۔
