شہباز شریف سے آزاد کشمیر کی سیاسی قیادت کی ملاقات ،کشمیر کاز کو اجاگر کرنے پر خراج تحسین

مظفر آباد :وزیراعظم شہباز شریف سے آزاد کشمیر کی سیاسی قیادت نے ملاقات کی ہے ،ملاقات میں وزیرِ اعظم آزاد کشمیر سردار تنویر الیاس، چوہدی محمد یاسین صدر پاکستان پیپلز پارٹی آزاد کشمیر، شاہ غلام قادر صدر پاکستان مسلم لیگ ن آزاد کشمیر، سردار حسن ابراہیم خان صدر جموں کشمیر پیپلز پارٹی شریک ہوئے، اسکے علاوہ وفاقی وزراء خواجہ سعد رفیق، رانا تنویر حسین، مریم اورنگزیب، مرتضی جاوید عباسی اورمشیروزیرِ اعظم قمر الزماں کائرہ نے بھی شرکت کی۔

آزاد کشمیر کی قیادت نے موجودہ حکومت کی ذاتی دلچسپی پر کشمیر کاز کو اجاگر کرنے پر وزیرِ اعظم شہباز شریف کو خراجِ تحسین پیش کیا ہے،اس موقع پر وزیر اعظم شہبازشریف نے کہا ہے کہ علیحدہ علیحدہ سیاسی وابستگیوں کے باوجود ملک بھر کی سیاسی قیادت کا آج مظفر آباد میں کشمیر کاز کیلئے اکٹھے ہونا خوش آئند ہے،ستمبر میں اقوامِ متحدہ کے جنرل اسمبلی کے اجلاس میں نے خود ہندوستان کے مقبوضہ کشمیر میں مظالم سے پوری دنیا کے سامنے پردہ اٹھایا،ساتھ دہائیوں سے ہندوستان کشمیر میں مظالم کی داستان رقم کر رہا ہے لیکن کشمیریوں کے جزبہ حق خود ارادیت کو ماند نہیں کر سکا،اگر ہم اسی طرح سیاست کو بالائے طاق رکھتے ہوئے اتحاد سے قومی ایشوز پر اکھٹے چلیں تو وہ وقت دور نہیں کہ ہمارے تمام مسائل حل ہو جائیں گے،کشمیر ایشو اور آزاد کشمیر کے تمام مسائل کا حل ہم بیٹھ کر نکالیں گے،

پاکستان آپکے ساتھ ہے اور ہمیشہ کشمیریوں کے ساتھ انکی جدوجہد میں شانہ بشانہ رہے گا،،اسپیکر آزاد کشمیر قانون ساز اسمبلی اور وزیرِ اعظم آزاد کشمیر نے وزیرِ اعظم کی 5 فروری یومِ یکجہتی کشمیر پر مظفر آباد آمد کو کشمیر کاز کیلئے کلیدی قرار دیتے ہوئے اسکا خیرمقدم کیا، اجلاس کے شرکاء نے کہا کہ وزیرِ اعظم پاکستان کی اس دن بذاتِ خود کشمیریوں کے مابین موجودگی کشمیریوں کے دلوں میں آزادی کیلئے موجود جذبے کو مزید بلند کرتی ہے. اس سے مقبوضہ جموں و کشمیر، ہندوستان، پاکستان اور پوری دنیا میں پاکستان کی کشمیریوں کی جدوجہد میں یکجہتی کا پیغام پہنچا ہے،

شرکاء نے مزید کہا کہ آزاد کشمیر کی سیاست کو بالائے طاق رکھتے ہوئے تمام مقامی سیاسی قیادت کشمیر کاز کیلئے نہ صرف یکجا ہے بلکہ پاکستان کے اس تنازعے میں اپنے کشمیری بہن بھائیوں کے ساتھ کو بہت قدر کی نگاہ سے دیکھتی ہے،وزیرِ اعظم آزاد کشمیر نے کہا کہ پورا کشمیر آج یومِ یکجہتی کشمیر کے موقع پر وزیرِ اعظم پاکستان کی مظفر آباد آمد پر دل کی اتھاہ گہرائیوں سے خوش آمدید کہتا ہے اور آج کے اس اقدام نے کشمیریوں کے دل میں اپ کی قدر کو مزید بڑھایا ہے. انہوں نے مزید کہا کہ پاکستان نے ہمیشہ کشمیریوں کے حقِ خود ارادیت کی جدوجہد میں انکا ساتھ دیا ہے بلکہ کشمیریوں کو پاکستانی شہریوں کی طرح تحفظ اور سہولیات کی فراہمی یقینی بنائی ہے۔